André Apaid vs Jean Erich René – Out 2003

Pandan blan malveyan yo t ap mobilize konze tout kalite (ak kravat, vrè diplòm, fo diplòm, kalachnikov, uzi…) pou ede l reyalize krim koudeta bisantnè a, detanzantan, chirepit te pete nan kan dyab la. Se konsa, sou fowòm OPL tout je te ka konstate ki jan André Saliba (Andy Apaid, ainsi connu) ki te majòjon nan ekip trèt sanginè ki te batize mouvman kriminèl yo an “Grenn nan bounda”, t ap rale zòrèy Jean-Erich René, youn nan ti restavèk plim-e-ank ki te mare nan pye tab li yo.

Nou va remake, pou fè wont sèvi kòlè, mouche René te pran pòz li pa kwè se ak Apaid li t ap kominike vre, menm si pou tout moun lisid ki t ap suiv pa te gen dout ton awogan ak ensistans Apaid pandan echanj yo te konfime relasyon restavèk ki te tabli ant 2 trèt yo.

Rafrechi memwa sa a enpòtan paske si, depi kèk ane Jean-Erich René travèse ale jwenn Jean-Baptiste Conzé, jiskaprezan Andre Saliba (Apaid) fenk kare rekrite tyoul k ap ede li banbile, fè krim sou krim sou zile Papa Dessalines nan.

***

André Saliba pa te janm demontre okenn siy respè nan jan li kominike ak ti chen kouchan ki t ap trennen nan ke jip li anndan gang GNB li t ap dirije a. Li te trete yo tankou tyoul ki pa merite okenn fòm tretman nòmal. Se konsa konpòtman ekip kriminèl yo te ye 20 ane pase. Ki jan ou wè li ye alèkile?
#Sakalakawèl