Koze Nèf Tankou Ze Fre

Eksperyans Ayiti ak mèsenè etranje

November 5, 2024

Koze Nèf Tankou Ze Fre

Published by Jean Saint-Vil at December 28, 2024

Tags

Pou ou resevwa anons piblikasyon tou nèf nou yo, souple abone sou kanal mwen an: www.youtube.com/@jafrikayiti

Emisyon Koze Nèf Tankou Ze Fre chita sou 3 wòch dife:
Pawòl Papa Dessalines
Chita Pale Ayisyen ak Ayisyen, nan lang Ayisyen
Refleksyon/Aksyon konsekan pou revolisyon tout bon
***
Chak Dimanch, midi won kon boul sole, pitit Ayiti toupatou gen yon randevou pa ka pa la ak Koze Nèf Tankou Ze Fre.
***
Èske ou te konnen Koze Nèf Tankou Ze Fre ap feraye depi anvan kreyasyon YouTube? Se nan ane 1999 Jafrikayiti tanmen yon kwonik ak tit sa a, sou pòtay iPort Henry Deschamps. Se nan kwonik sila a, Jafrikayiti te lanse premye defi bay yon Prezidan Ayisyen pou li mete dosye Restitisyon Ranson Charles X lan devan boul figi Lafrans. Imajine konbyen kòb nou te estime Lafrans dwe Ayiti alepòk?

Prezidan René Préval te fè lach nan vil Moncton, nan mwa Out/Septanm 1999. Men, yon jou 7 Avril 2003 Prezidan Aristide te mete dosye restitisyon an devan je ak nan zòrèy tout moun sou latè, alawonnbadè. Tan fè tan kite tan, revolisyon tout bon ap rapousuiv. Wè pa wè, fòk lavi fleri pou nèg ak nègès an Ayiti, epi toupatou sou latè.

Sezon 2025

Pierre “Jistis” Lubin – 26 Janvye 2025
https://www.youtube.com/live/ipiecm1H0Yo

JISTIS

Ou ka abitye tande entèvansyon li nan radyo, nan konferans osnon nan emisyon sou entènèt la. Ou ka te etidye ak li nan Inivèsite, travay ak li nan rechèch li reyalize sou teren toupatou an Ayiti. Ou ka kwaze ak li sou kanpis Inivèsite McGill, nan Montreal osnon ou te grandi ak li nan New-York City osnon ou te anwole ansanm ak li nan kò Marin Etazini…

Mèzalò, èske ou te okouran pou li rive la, Doktè Pierre “Jistis” Lubin te pase nan “gang” jenn Ayisyen New-York? Èske ou konnen pami 42 jenn gason nwa ki te grandi ak li nan kè vil Brooklyn, konbyen ki vivan epi byen pòtan jounen jodi a?

Vin koute eksperyans yon pitit Ayiti ki ka ede nou reflechi sou posiblite sove, refòme, rekipere kèk jenn fanm ak jenn gason ki aktyèlman sou move pant – kit se an Ayiti osnon nan kominote Ayisyen toupatou.

Premye pati (mache pale) a te anrejistre nan vil New-York, Dimanch 19 Janvye 2025. Doktè Pierre “Jistis” Lubin kase randevou pou li retounen kòm Envite Spesyal nan Koze Nèf Tankou Ze Fre, Dimanch 9 Fevriye 2025.

—

2025 se ane Reparasyon ak Restitisyon pou tout pitit Ayiti, toupatou!

Marlene Daut – 19 Janvye 2025
https://www.youtube.com/live/9VeILCGt3sw

Ou ka abitye wè li k ap defann lonè ak diyite pèp Ayisyen an nan konferans toupatou sou latè. Ou ka gen opòtinite suiv kou li nan divès inivèsite. Men, ojis, ki kote manman Marlene Daut te kaselezo? Ki chimen ki te mennen li kanpe nan mitan ekip pwofesè Yale University kote plizyè Prezidan Etazini te etidyan?

Ki jan Marlene Daut wè dosye Restitsyon – Reparasyon an?

Ki revelasyon nou ka jwenn nan liv li “The first and last King of Haiti” (Premye ak dènye Wa Ayiti), ki fenk pran lari, mwa sa a?

Mwen pale anpil gwo koze ki regade w ak Pwofesè Marlene Daut, ni an Kreyòl, nan an Angle. Vin koute…

***

Jean Fils-Aimé – 12 Janvye 2025
https://www.youtube.com/live/y2P_prQMTtU

Dòk Jean Fils-Aimé Ph.D. ede nou tanmen yon braselide sou objektif, fòm ak strateji pitit Ayiti k ap respire toupatou sou latè, dwe bay KONBA ane 2025 lan. Yon ane kote anpil konpatriyòt fè plan retounen viv lakay yo – lè nou va jwenn fòmil pou netralize anpil tèwòris ki kontinye ap viv nan san pèp inosan an, jiskaprezan. Yon ane kote plizyè blan malveyan gen gwo tèt chaje pou yo jere sou pwòp teritwa pa yo, kit se akoz Gwo Moso Donald Trump k ap fè menas ba li boulova, pasi pa la, osnon nan peyi Kanada kote enkyetid politiko-ekonomik fè kenken jouk Ti Trudeau sètoblije reziyen li ale remize nan yon kwen.

Ki strateji efikas Pèp Ayisyen an dwe itlize nan sezon Konba 2025 lan pou nou fòse gwo vòlò, eskamòtè Bill Clinton, Jean-Max Bellerive, Michel Martelly… an fanmi e alye, remèt yon bon pati nan plis pase 10 milya dola vèt, lajan rekonstrisyon Ayiti a ki fè fon, pandan malfèktè yo ap boloze lib e libè?

Martine & Pierre Claude Robergeau – 5 Janvye 2025
https://youtu.be/bPWbuKMEjXQ
Ki jan yon koup Advantis 7èm Jou ki t ap viv Kanada fè chwe nan yon aktivite kiltirèl Vodou nan Kotonou, Benen, jouk sou kontinan Lafrik? ÈSKE MARTINE & PIERRE CLAUDE CHITE OSNON SE CHITA YO CHITA?